Decenas de pezas do Museo da Civilización de Mosul, principalmente estatuas, foron destruídas esta semana por membros da organización dos Separatistas de Al Qaeda en Irak e Siria. O museo sufriu así un novo espolio.
A intención dos asaltantes-destrutores era desta volta, segundo fixeron público, destruír ídolos que representaban gobernantes crueis e impíos, por máis que estes fosen gobernantes de hai moitos séculos.
Por fortuna, a maior parte das pezas destruídas non eran as orixinais. Pero iso non quita de saber cal era verdadeira intención dos que con saña empregaban mazos e trades para desfacer as históricas figuras.
Saña contra as imaxes semellante á crueldade que a cotío os membros do grupo aplican contra un enorme número de persoas, moitas delas doutras relixións ou de ningunha pero a enorme maioría tamén musulmás e habitantes daqueles territorios.
Unha reflexión sobre isto, que atopo moi atinada, foi feita por Miguel-Anxo Murado no seu artigo Tigris e Éufrates. Convido a lelo, convencido de que, por moi doloroso que sexa o tempo que ata entón transcorra, acabará cumpríndose a profecía de que a violencia coa que os integrantes deste grupo actúan será a que os acabará levando ao seu fin.
Etiquetas: cultura barbarie arte